دعاء فؤاد تكتب: «ملطشة القلوب» | الصباح

دعاء فؤاد تكتب: «ملطشة القلوب»

دعاء فؤاد

دعاء فؤاد

من كام شهر كده ظهرت على الساحة الغنائية أغنية كسرت الدنيا اسمها ملطشة القلوب للمطرب مصطفى شوقى وكلمات صابر كمال.

بصراحه اسم الأغنية شدنى فقولت ادخل أسمعها لقيت كلمات وألحان بسيطة وتدخل القلب بس بعيدًا عن جمال الكلمات وصوت مصطفى شوقى المميز خلينا نركز فى اسم الأغنية، لأننا كتير أوى بنسيب قلوبنا تبقى ملطشة وبنستسلم لضعفنا وأحنا راضيين جدًا وبكامل قوانا العقلية.

أحنا بنخلى قلوبنا ملطشة فى كل مرة بنتخان فيها وبنرجع نتصالح بكلمتين ونقول معلش وغلطة وتعدى مع إن الغلطة بتجيب غلط بعده كتير والخيانة بتجيب خيانة أكبر

بنخلى قلوبنا ملطشة لما بنسامح اللى بيمشوا بمزاجهم ولما يرجعوا يلاقوا لسه مكانهم جوانا محفوظ.

بنخلى قلوبنا ملطشة لما بندى أعذار عشان نقبل كل العيوب ونتغاضى عن كل الغلط وبنتهاون فى حقوق القلب اللى محتاج يتحب زى ما يحب، ومحتاج يحس بالأمان عشان يحافظ على نبضه زى ما بيحسس كل اللى حواليه بالأمان.

احذروا تبقوا ملطشة لسوء اختياركم وأوعوا تنسوا أن قلوبكم لها عليكم حق أنها تتصان ولا تتخان ولا تتهان.

وصدق مصطفى شوقى لما قال يا جلاب المصايب..


اضف تعليقك

لأعلى