أحمد حسن يوجه رسالة لـ"ريهام سعيد" بعد وقف برنامجها | الصباح

أحمد حسن يوجه رسالة لـ"ريهام سعيد" بعد وقف برنامجها

أحمد حسن

أحمد حسن

وجه أحمد حسن لاعب النادي الأهلي السابق رسالة للإعلامية ريهام سعيد عبر حسابه الرسمي بـ"فيس بوك"، وذلك بسبب تنمرها ضد الأشخاص أصحاب الأوزان الكبيرة، حيث قال:

"الأستاذة ريهام سعيد خرجت علينا وقالت بالنص "الناس التخينة ميتة، عبء على أهلها وعلى الدولة، وبيشوهوا المنظر"، "منظرك بيكون مش حلو وأنت بالعباية أو الجلابية ومش قادرة تمشي، بتفقدي جزء من أنوثتك". بصي يا ريهام هكلمك عملي وبدون تنظير.. شايفة الست القمر السمينة دي! تبقى أمي وفي زيها ملايين من أمهاتنا واخواتنا العظيمات إللي جابوا رؤساء وعلماء ومبدعين و رياضيين وفنانين و إعلاميين للأسف انتي واحدة منهم وناجحين في كل المجالات في البلد الناس دي تعبوا وشقوا وعرقوا واشتغلوا وقعدوا على ولادهم وعلموهم وحاجات كتيرة فى مشوار الحياة، الأمهات دول بركة حياتنا وكفاية دعوة واحدة بس منهم تريح القلب وتفتح الأبواب المقفولة الناس دي اللي انتي متعرفيش عنهم وعن ظروفهم حاجة انتي اتكلميت عنهم بسوء لأنك بإختصار معرفتيش قيمتهم ولا هتعرفيها لأن الناس اللي وصفتيهم بالميتة دول مبيموتوش حتى ولو رحلوا عن الدنيا لأننا بنعيش بكل حاجة حلوة علموها لينا وسابوهلنا وبيسبوهلنا. يا ألف خسارة على الإعلام اللي بدل ما يعلم وينصح ويقدم رسالة محترمة بقى يسخر وينظر على الطيبين اللي فاضلين في حياتنا. نصيحة لوجه الله على الملأ زي كلامك ما كان على الملأ .. راجعي نفسك وحاولي تعتذري لكل الناس اللي زعلتيهم جايز يسامحوكي". 

وكانت إدارة قنوات الحياة قد أصدرت قرارًا بوقف برنامج ريهام سعيد على القناة لحين انتهاء التحقيقات التي يجريها المجلس الأعلى لتنظيم الإعلام. 


اضف تعليقك

لأعلى